SYARAT WAJEB SAH PUASA

Bagi geutanyoe ureung iseulam

Balegh berakal kön ureung gila

Na kemampuan neubri lé tuhan[1]

Wajeb hai rakan tanyoe puasa

Peut boh peukara jinoe lôn nazham

Ingat hai abang syarat puasa

Pertama ta niet rasul sabdakan

Mandum amalan niat bèk lupa

Dua peuji’oh Jimak hai rakan

Istimna’ taulan bèk cuba-cuba

Keluar mani deungon sentuhan

Bateue hai taulan puasa hamba

Bèk saja muntah keulhèe lôn nazham

Peutheun hai rakan bèk saja-saja

Keupeut ta jaga rongga hai insan

Bèk tamong keunan meusapue benda

Rongga terbuka ulôn maksudkan

Lagè tamselan bathen telinga

Tanyoeng bak guree ngak beutoi paham

Dalam amalan ileume beuna

(Bedasarkan Matan Taqrib Abi Syuja', Kitab al-Muqaddimah al-Hazramiyah beserta syarahnya, al-Manhajul Qawiem. Pada Kitabush Shiyam. dan al-Iqna' al-Hijawi)

NYANG HAK TEURIMONG ZAKET

Seunef yang lapan neukheun lam Quran

Nyang keuh hai rakan nyang hak terima

Yang keu phon fakir sedeh that rakan

Dua hai taulan miskin geu nama

Nyang keu lhèe ame sibok hai rakan

ureung pilihan lantik lé raja

yang keupeut kafé tamong iseulam

Muallaf  taulan lemah imannya

Keu limong riqab lamit mukatab

Harta dihajat untuk merdeka

Keu nam si gharim utang meukumat

Yang muprang jihad tujoh ta kira

Si Ibnu sabi teuma keu lapan

Nyang tinggai taulan safir geu mula

Atau geulewat u gampoeng pulan

Nibak gampong nyan zakeut terima

(Bedasarkan al-Iqna' al-Hijawi) 

ZAKET FITRAH

Meuban jitamong malam lebaran

Fitrah hai rakan wajeb bak gata

bak urueng mampu na kelebihan

jak jok hai rakan peusuci harta[1]

makanan pokok ghalib di nanggroe

nyankeuh hai adoe keu fitrah gata[2]

dua aree breuh bak surah tanyoe

bacut han sampoe meunan ta kira[3]

---

[1] Berdasarkan al-Minhaj 
[2] Berdasarkan al-Minhaj 
[3] Maksudnya sedikit tidak sampai dua bambu. Menurut hasil mubahasah di MUDI Mesjid Raya, ukurannya ialah 3,456 liter atau 1,728 bambu atau 2,7648 kg.

ZAKET TIJARAH

Meunyoe ka trôh thon seureuta nisab

Allah yue zakat tijarah gata[1]

Barang lam keude mandum ta hisab

Laba pih meuhat beuna ta kira[2]

Meuyoe troh nisab lagè bak naqad[3]

Zakeut ka meuhat wajeb bak gata

Ka super peut plôh peuteubit zakat

Beudoh jak intat keu mustahiqnya

---

[1] Imam an-Nawawi dalam al-Minhaj berkata “syarat zakat tijarah sampai tahun dan nisab yang dii’tibarkan pada akhir tahun” 
[2] Berkata Imam an-Nawawi dalam al-Minhaj “ويضم الربح، إلى الأصل في الحول إن لم ينض” 
[3] Jika yang jadi modal tijarah adalah Naqad (emas atau perak) maka pada akhir tahun dihargakan dengan naqad juga yang nisab’a sudah kami jelaskan diatas. Jika modal tijarah adalah mata benda selain naqad maka dihargakan dengan naqad yang lebih ghalib (lebih biasa digunakan) (al-Minhaj)

BATEU SEUMAYANG

Siblah peukara  jaga hai akhi

Hanjeut  terjadi lam shalat gata

Bateu seumbahyang jika terjadi

Jinoe lôn rawi keu wareh dumna

Keu phon “berkalam” meunyoe ta saja

Teuma keu dua bergerak nyang le

Keu Lhèe meu hadas  meunyoe ji teuka

Keu peut saudara najih dit dan le

Limong  terbuka aurat hai rakan

Keunam hai taulan niet yang meutuka

Tujòh Peulikôt Qiblat  hai abang

Keu lapan makan wahé cehdara

Jinoe sikurueng ta jeb minuman

Siplôh hai dek gam laju ter tawa

Siblah nyang akhé jaga hai rakan

Murtad hai taulan iman binasa

RUKON SEUMAYANG

Rukon seumbahyang beu tanyoe turi

Deungö hai akhi jinoe lôn mula

Yang pertama  niet dua teukeubi

Keulhèe berdiri bagi yang kuasa

Keupeut fatihah ruku’k keu limong

Keu nam bèk bingöng i’tidal sigra

Tujòh ta sujud bak dhoe beu keunöng

lapan ta tamöng duek antara dua

Teuma sikureung  duek tahyet akhé

Siploeh beu hasé tahyet ta baca

Siblah seulaweut  nabi nyang akhé

Dua blah meu sampé[1] saleum lé gata

Teuma keu lhèe blah wahé e rakan

Teureutib taulan bèk tuwö gata

Makna teuretib beu meu aturan

‘Oh noe keuh rakan abeh peukara

(Berdasarkan al-Minhaj Imam an-Nawawi)

---

[1] Makna “meusampe” lheuh saleum ka seuleusoe seumbahyang

SYARAT WAJEB SEUMAYANG

Meunyoe bak hamba na lhèe peukara

Shalat ka wajeb wahe cehdara

Keuphoen Iseulam balegh keu dua

Keu lhèe meu-akai neu taklif gata

Syarat seumbahyang limong hai abi

DeungÖ lôn rawi mandum peukara

Makrifah wate yang phon hai akhi

Hadap Qiblati nyan yang keu dua

Yang keu lhèe Aurat ta top hai rakan

Keupeut hai taulan hadas hanjeut na

Keu limong najih bèk na bak badan

Nibak pakaian atau bak tika

NAZHAM AGAMA KE MUBTADI

Wahe adek lôn yang di công balè

Atau công kaye deungö hai neuk da

Meunyoe seumbahyang ka tamong watè

Bèk lé meu lalè jak wudhu’ sigra

na nam peukara bak wudhu’ peurlè

keuphon meuteuntè niat saudara

Dua rhah muka jinoe yang keulhèe

Jaroe ‘oh singkè ta rhah ban dua

Keupeut rhah ulèe surah bak gurèe

Keu limong peurlè rhah gaki gata

Man dua gaki ‘oh gatok ta plè

Keunam bèk lalè teureutib beuna

FADILAH BACA BISMILLAH

Rayeuk fadhilah baca bismillah

Meunan neupeugah rasul mustafa

Hancoe dum syetan ngon izin Allah

Ka lagè timah lam apui raya

sikureung  blah boh harah bismillah

saban ngon jumlah khazin nuraka

bak zabaniyyah Allah peuleupah

meunyoe bismillah tanyoe tém baca[1]

na cit teusebot dalam riwayah

syuruga indah ka ji meudo’a

soe yang tém baca akan bismillah

lindoeng ya Allah dari nuraka

Meunyoe tan takheun akan bismillah

syetan ji langkah u rumoeh gata

watè pajoeh bu hana ji minah

bak ie saboeh glah syetan jak rasa

dalam keuleumbu ka ji jak langkah

jak istirahah sapat ngon gata

watè meu jimak ka dengon zaujah

syetan yang laknah sajan ngon gata

syetan meujimak sigö ngon ayah

ka ji jak keubah bijeih durjana

ban rayeuk aneuk faseq sileumpah

beutoei ngon salah ji turi hana

---

[1] Berdasarkan penuturan Ibnu Mas’ud

BISMILLAH SABOH AYAT AL FATIHAH

Ayah dan ibu di nanggroe indah

Suai bismillah khilaf ulama

Puekeuh nyan ayat dari fatihah

Atau pih ayah hana geu kira

Ulama tanyoe yang syafi’iyyah

Meunan cit surah imam hambali

Geukheun bismillah ayat fatihah

Kitab ta peuhah ta mita dali

Lam saboeh hadits Ummi salamah

Jelas neupeugah bacaan nabi

Nabi neubaca akan Bismillah

Di dalam shalah wahé ya akhi

Yoh goh neubaca al-Hamdulillah

Awai bismillah neukheun lé nabi

Nabi neu anggap nyan saboh ayah

Dari fatihah meunan geurawi

Laen pendapat abu hanifah

Ka muwafaqah Imam maliki

Bismi kön ayat dari fatihah

Jinoe ta surah ta mita dali

Lam Hadits Anas yang Radhiallah

Dron nyan peureunah shalat ngon nabi

Na cit neu ikot shalat sahabah

Hana tom peurnah neu deungö bismi

Khilaf Ulama nyan saboh rahmah

Asai di Ummah bèk saleng benci

Dali ka jeulah ayat dan Sunnah

Mazhab Arba’ah doenya akui

(Berdasarkan al-Majmu' Imam an-Nawawi)

MULA HAKIKI MULA IDHAPI

bak amai yang göt dalam syariah

beuna bismillah bèk tuwö gata

ngak le beureukat neubi lé Allah

meunan neupeugah Rasul mustafa

lam hadits laen nabi neupeugah

alhamdulillah beuna ta baca

meunyoe tan mula deungon hamdalah

Kureung barakah rugoe saudara

rab rata kitab ulama surah

lafazh bismillah mula hakiki

 saweub tan laen yoh goh bismillah

meunan keuh surah ulama rawi

‘oh lheuh geumula deungon bismillah

laju hamdalah mula izhafi

saweub ka awai mula bismillah

seubot hamdalah geukheun izhafi

lagè lam Qur’an susunan indah

surat fatihah tacok keu dali

hinan ta kalon awai bismillah

dudoe hamdalah pujoe keu rabbi

BISMILLAH PUJOE

Deungon Ismullah ulôn mulakan

Pujoe keu tuhan yang maha esa

Seulaweut saleum ateuh janjongan

Ahli yang islam sahabat serta

Teuka lam haté saboh hajatan

Peugèt ringkasan ilme agama

Saweub ileume peunteng that rakan

Bèk salah jalan udep lam doenya

Kalam ulama lam kitab matan

Lôn terjemahkan ubéna kuasa

Haba meususôn ngon cara nadham

Bèk bagah bosan bagi pemula

Ubéna salah serta khilafan

Mohon ampunan Allah ta’ala

Ishlah bak gurèe ulôn harapkan

Meu’ah bak taulan ubéna lupa

Taufiq hidayah harap bak tuhan

Seulamat iman tamong syiruga

Hana soe halang kehendak tuhan

Allah ya rahman yang po kuasa

SULOH YANG AWAI

Bedeuh Jak Taubat Yoeh Gohlom Matee
Yoh Gohlom Ta Cre Tatinggai Donya
Yoh Gohlom Tasoek Pakaian Puteh
Yoh Gohlom Ta Eh Dalam Kureunda

Suloh Yang Awai Laju Ta eh Le
Suloh Yang Akhe Beudoh Meujaga
Oh Ban Teu Keujoet Teuma Ta Duek Le
Laju Tapike Limoeng Perkara

Yang Pertama Phon Ingat Keu Tuhan
Keu Dua Taulan Ingat Keu Dausa
Ingat Keu Dausa Tamoe Beu Kayem
Teuma Ta Khem-khem Oeh Neu Bri Bala

Teuma Nyang Keulhee Ingat Keu matee
Bandum Teuh Sare Tatinggai Donya
Donya Ta Tinggai Sinoe Lam Nanggroe
Getanyo Tawoe U Asai Mula
Asai Bak Tanoh Meuwoe Bak tanoh
Tuhan Peu Teungoh Blang Padang Masya

Teuma nyang Keupeut Ingat Keu Kubu
Taduek Teukuku Taroe Ie Mata
Taduek Teuh Sidroe Meu Ngoen Teuh Pih Tan
Sidroe Hai Taulan Dalam Keurenda

Seupot Pih That-that Arat Pih Sangat
Kaleumah Teumpat Dalam Nuraka
Ji Teuka Azeub Meu Bagoe-bagoe
Ta Lakee Woe U Dalam Donya
Oh Talakee Woe Teuka Rintangan
leupah That Bimbang Dile Lam Donya

Yoh Dalam Donya Hana Thee Keu Droe
Laju Ta Peutoe Ho-ho yang suka
Teulah Jino Hana Faedah
Lom Meutamah Gata Geusiksa

Teulah Jinoe Apoeh Ulee
That Paleh Kee Yoh Dalam Donya
Adak Loen Tupu Sidumno Balah
Hana Kuminah Nibak Mushalla

Teuma Yang Limoeng Ingat Akhirat
Hana Trep Lambat Taduek Lam Donya
Taduek Lam Donya Preh Jan Tho Reu Oeh
Miseu Tapiyoeh Yup Kayee Raya

Menan Geu Tamsil Taduek Disinoe
Dang-dang Tawoe U Nanggroe Baqa
Khabar Loen Nyo Ken Pakri-pakri
Hadist Nabi Pang Ulee Kita

Meuhan Neupateeh Wahai Rakan Loen
Dalam Al-Qur'an Neujak Pareuksaa
Meunyo Hana Jeut Makna Qur'an
Jak Taduek sajan Dengoen Ulama
Pat Hana Jeut Beu Tatem Tanyoeng
Pat Han Keuneeng Beu Ta Pareksa